24. september 2009 14:16

Tæplega 50% þjóðarinnar á Facebook

ABS fjölmiðlahús hefur í rúmt ár fylgst með fjölda íslenskra notenda á samfélagsvefnum Facebook. Íslenskum notendum fjölgaði um helming frá haustinu 2008 til áramóta 2009.

Síðastliðið haust voru 60.000 íslenskir notendur skráðir á síðuna en um síðustu áramót voru þeir orðnir 120.000. Frá síðustu áramótum hefur þeim fjölgað jafnt og þétt og í dag eru þeir samtals 158.300 eða tæplega 50% af þjóðinni.

Áhugi íslenskra kvenna er þó nokkuð meiri en karlmanna á samskiptasíðunni.  Kynjaskiptingin er 55% konur á móti 45% karla.

Mikilvægt er að hafa í huga að tölurnar eru aðeins ýktar. Oft er um tvítalningu að ræða þar sem sumir eru með tvo prófíla og stofnaðar eru síður fyrir fyrirtæki, félagasamtök og aðdáendaklúbba.

Þróun Facebook-notenda á Íslandi (smella til að stækka mynd)

Samanburður við Norðurlöndin

Í samanburði við Norðurlöndin eru Íslendingar hlutfallslega mjög virkir á Facebook.  Ísland og Noregur skera sig þó úr með tæplega helming skráða notendur á samskiptasíðuna.

Fjöldi Facebook-notenda á Norðurlöndunum

Á þessari síðu má sjá útbreiðslu Facebook-notenda á heimsvísu. Á síðunni er hægt að sjá fjölda og hlutfall notenda eftir löndum.